洋紫荊花顏色鮮艷搶眼，而且本港隨處可見，頗受香港人喜愛。洋紫荊喺1965年已經被定為香港市花，由已成歷史嘅市政局局徽以至金管局局徽同回歸後嘅香港區徽都以佢為設計概念。甚至舊年反送中運動都有人以黑洋紫荊旗作為抗爭符號之一，足見社會各界都視佢為香港嘅代表。而最近傳出有紅色勢力成立咗一個紫荊黨，劍指香港各級選舉，立即引起社會各界議論紛紛。
暫時外間掌握嘅資料有限，但其實淨係睇個黨名已經出事。紫荊係一種中國嘅植物，同香港本土嘅洋紫荊係完全唔同嘅物種，偏偏中共就崩口人忌崩口碗，見到個「洋」字就諗返起百幾年前洋鬼子欺壓中國人嘅國恥，近年又經常話有外國勢力插手香港事務，於是更加抗拒，夾硬要用「紫荊花」哩個稱呼代替，連民建聯創黨主席曾鈺成都曾經為此寫過文章評論，大家有興趣可以參閱，為咗減省篇幅我就唔多講喇。
但係更大嘅問題出咗喺個黨徽上。大家都知洋紫荊有五塊花瓣五條花蕊，哩啲特徵喺香港區徽上都可以清楚辨認得到。紫荊黨黨徽嘅設計應該都參考咗洋紫荊花嘅外型，可以見到係由五個代表五塊花瓣嘅圖形組成。但問題係中間除咗一橫同一個類似希臘字母Ω嘅符號外就只有三個圓點，如果哩三點係代表花蕊，就同有五條花蕊嘅洋紫荊不符，反而係同紅粉羊蹄甲一樣（哩個亦係洋紫荊同紅粉羊蹄甲外觀上最大分別之一）。
近年學術研究顯示洋紫荊並非獨立品種，而係由紅花羊蹄甲同宮粉羊蹄甲混種而成，同香港中西文化薈萃、獨一無二嘅歷史背景相映成趣。而且洋紫荊係冇辦法自行繁殖，正如中共一直嘗試喺神州大地上複製一個新香港而不得要領。哩啲發現無意間為洋紫荊更加添上一多層寓意，偏偏紫荊黨連屬於混種嘅香港市花都錯畫成佢嘅原種之一，咁個黨所追求嘅又點會係真正嘅一國兩制？見微知著，所謂嘅海歸派同新香港人對香港嘅理解睇怕都係得咁多。
喺反送中運動過後、國安法出台之際成立新政黨，仲話要以擁有25萬黨員為目標，所謂何事相信香港人都心裡有數，既然係咁又何必掛「洋紫荊」之名去演一齣冇觀眾會睇嘅戲呢，你都係做返你嘅「紅花」算吧啦。
