轉眼已經當選區議員一周年，中間實在有太多嘢始料不及。
仲記得一年前通頂冇瞓朝早謝完票，之後稍為休息咗一陣就收到大家話要拎住民意授權去理大救人嘅消息。當時冇人諗過方興未艾嘅抗爭運動，竟然會因為一場突如其來嘅世紀疫症而沉寂落嚟。
然後係國安法通過，間接向全世界、包括香港人在內宣告一國兩制結束，其後政府再話反對國安法就冇得選立法會，當日唔少區議員都公開表過態反對，於是有人開始暗暗擔心DQ嘅刀會伸到去自己頸上。
再嚟就係立法會選舉，好多區議員協助過推動初選，希望集中票源爭取最多議席，結果政府以疫情為藉口押後最少一年，實際上仲會唔會有得選都係未知之數，就算有都可能因為大灣區投票而變得毫無意義。
掛得區議員哩個身份，無論如何都要努力去做，不過面對中共全面收緊管治，政治上確實係丁點成果都爭取唔到。連地區層面上嘅工作都畀民政處連番刁難，最近又開始吹風要整頓區議會，唔理係閂水喉、DQ、直接取消定係另起爐灶分庭抗禮都好，總之肯定係一波未平一波又起。
唔知各位街坊平日有幾關心黃大仙區議會嘅動向，冇留意嘅可能會覺得舊年投完票之後就冇曬聲氣，所謂「黃金大仙」好似咩都冇做過，當一眾土共媒體搏命搵十八區區議會痛腳然後做專題報道時，黃大仙區都好似好少被提及咁。
但就我所見，我身邊廿四位同事都係好畀心機同認真去做事，只不過大家可能會選擇比較務實嘅方式，就算暫時未做到靜靜地贏，都起碼唔好高調完滿盤落索。
相信今日好多同事都會寫感想，但老實講真係冇太多開心嘢值得記低，可幸嘅係自己意志依舊堅定。所謂齊上齊落，當中共條紅線步步推進，我哋就喺後方尋找空間，有條不紊咁重整旗鼓，不爭朝夕，同佢繼續拉鋸。
其實仲有其他嘢想分享，不過留返年尾回顧再慢慢講，如果大家鍾意睇，日後就寫多少少啦。
(原文於2020年11月24日Facebook專頁上發佈)
